O‘zbekiston Respublikasi Oliy va o‘rta maxsus ta’lim vazirligining 2021 yil 5 martdagi 120-sonli buyrug‘iga  1-ilova

I.Umumiy qoidalar.

1.1.    O‘zbekiston Respublikasi Oliy va o‘rta maxsus ta’lim vazirligining korrupsiyaga qarshi kurashish siyosati (bundam buyon matnda Siyosat deb yuritiladi) vazirlik markaziy apparati, vazirlik huzuridagi markazlar kasbiy ta’limni rivojlantirish va muvofiqlashtirish hududiy boshqarmalari, oliy va o‘rta maxsus, professional ta’lim muassasalari raxbar-xodimlari, professor-o‘qituvchilar, talaba-yoshlar o‘rtasida korrupsiyaga qarshi kurashish madaniyati darajasini oshirish maqsadida ishlab chiqilgan.

1.2.    Siyosat korrupsiyaga qarshi kurashish bo‘yicha xalqaro tashkilotlar tavsiyalari va yetakchi xalqaro amaliyot asosida ISO 37001:2016 "Korrupsiyaga qarshi kurashish menejmenti tizimlari - foydalanish bo‘yicha talablar va tavsiyalar" xalqaro standarti talablarini inobatga olgan holda O‘zbekiston Respublikasining qonunchiligi talablariga muvofiq ishlab chiqilgan.

1.3.    Ushbu Siyosat talablari o‘zbekiston Respublikasi Oliy va o‘rta maxsus ta’lim vazirligining tarkibiy tuzilmalari, vazirlik tizimidagi oliy va o‘rta maxsus, professional ta’lim muassasalari uchun majburiy, boshqa vazirlik va idoralar tizimiga kiradigan oliy va o‘rta maxsus, professional ta’lim muassasalariga tavsiyaviy xarakterga ega.

1.4.    Vazirlik markaziy apparati va tarkibiy bo‘linmalarida korrupsiyaga qarshi kurashishning asosiy maqsadlari quyidagilar hisoblanadi:

vazirlikning barcha boshqarma va bo‘limlari, vazirlik huzuridagi tashkilotlar, kasbiy ta’limni rivojlantirish va muvofiqlashtirish hududiy boshqarmalari, oliy va o‘rta maxsus, professional ta’lim muassasalari (bundan buyon matnda vazirlik tarkibiy tuzilmalari deb yuritiladi) faoliyatining barcha sohalarida korrupsiyani oldini olish bo‘yicha chora-tadbirlarni amalga oshirish;

oliy va o‘rta maxsus, professional ta’lim muassasalari rahbar-xodimlari, professor-o‘qituvchilar, talaba-yoshlarning huquqiy ongi va huquqiy madaniyatini oshirish, korrupsiyaga nisbatan toqatsiz munosabatni shakllantirish;

korrupsiyaviy huquqbuzarliklarni o‘z vaqtida aniqlash, ularga barxam berish, ularning oqibatlari, ularga olib keluvchi sabablar va shart-sharoitlarni bartaraf etish, korrupsiyaviy huquqbuzarliklar sodir etilgan tavdirda javobgarlikni ta’minlash;

vazirlik va uning tarkibiy tuzilmalarida korrupsiyani tubdan yo‘qotishga erishish.

1.5.   Siyosat vazirlikning lokal hujjati sifatida yuqorida ko‘rsatilgan asosiy maqsadlarga erishish uchun vazirlik va tarkibiy tuzilmalarida korrupsiya bilan bog‘liq huquqbuzarliklarni profilaktika qilish va ularga bardam berishga qaratilgan asosiy talablar va tamoyillarni belgilab beruvchi asos hisoblanadi.

1.6.   Mazkur Siyosatning talablari egallab turgan lavozimi va bajaradigan vazifa va funksiyalaridan qatiy nazar vazirlik va tarkibiy tuzilmalar bilan mehnat munosabatlarida bo‘lgan barcha xodimlarga nisbatan tatbiq etiladi.

1.7.   Vazirlik va tarkibiy tuzilmalarga ishga qabul qilinayotgan xar kanday shaxs ushbu Siyosat bilan imzo qo‘ygan holda tanishishga va uning qoidalariga rioya qilishga majbur.

1.8.   Ushbu Siyosatda quyidagi asosiy tushunchalar va atamalar qo‘llaniladi:

korrupsiya - shaxsning o‘z mansab yoki xizmat mavkeidan shaxsiy manfaatlarini yoxud o‘zga shaxslarning manfaatlarini ko‘zlab moddiy yoki nomoddiy naf olish maqsadida qonunga xilof ravishda foydalanishi, shuningdek, bunday nafni qonunga xilof ravishda taqdim etish;

korrupsiyaga oid huquqbuzarlik - korrupsiya alomatlariga ega bo‘lgan, sodir etilganligi uchun qonun hujjatlarida javobgarlik nazarda tutilgan qilmish;

manfaatlar to‘qnashuvi - vazirlik va uning tarkibiy tuzilmalari xodimlarining shaxsiy (bevosita yoki bilvosita) manfaatdorligi uning xizmat majburiyatlarini lozim darajada bajarishiga ta’sir ko‘rsatayotgan yoxud ta’sir ko‘rsatishi mumkin bo‘lgan vaziyat;

korrupsiyaviy harakatlar - xodim tomonidan pora beruvchining manfaatlarini ko‘zlab harakat yoki harakatsizligi uchun bevosita yoki bilvosita, shaxsan yoki uchinchi shaxslar orqali porani ya’ni pul, qimmatbaho qog‘ozlar, boshqa mol-mulkni, mulkiy tusdagi xizmatlarni, boshqa mulkiy huquqlarni olish, talab qilish, taklif qilish, va’da qilish va berish, shuningdek, pora berish va (yoki) olishda vositachilik qilish, rasmiyatchiliklarni soddalashtirish uchun to‘lovlarni olish, xodim tomonidan pora olish yoki huquqka xilof boshqa maqsadlarda o‘z xizmat mavkeidan noqonuniy foydalanish;

xodim - vazirlik va tarkibiy tuzilmalari bilan mehnat munosabatlariga kirishgan shaxs;

yakin karindoshlar - ota-ona, tug‘ishgan va o‘gay aka-ukalar va opa- singillar, er (xotin), farzandlar, shu jumladan farzandlikka olinganlar, bobolar, buvilar, nevaralar, shuningdek erning (xotinning) ota-onasi.