1. Umumiy qoidalar

Farg‘ona jamoat salomatligi tibbiyot instituti (keyingi o‘rinlarda – FJSTI) tarkibida Jismoniy va yuridik shaxslarning murojaatlari bilan ishlash, nazorat va monitoring bo‘limi (keyingi o‘rinlarda – Bo‘lim) faoliyat yuritadi.

Bo‘lim shtat birligi 1 nafar bo‘lim boshlig‘i va 1 nafar bosh mutaxassisdan iborat. Bo‘lim FJSTIning tarkibiy bo‘linmasi hisoblanadi hamda uning faoliyati bo‘yicha Nizom ishlab chiqilgan va tasdiqlangan.

Mazkur Nizomda Bo‘limning:

asosiy vazifalari va funksiyalari,

huquqlari,

javobgarligi,

faoliyatini tashkil etish tartibi,

xodimlarning funksional vazifalari va javobgarligi
belgilab beriladi.

Bo‘lim faoliyati institutda monitoring va nazorat tizimini boshqarish, shuningdek jismoniy va yuridik shaxslar murojaatlarini qabul qilish va ko‘rib chiqish jarayonlarini muvofiqlashtirishga yo‘naltirilgan.

Bo‘lim o‘z vakolatlari doirasida bevosita institut rektoriga bo‘ysunadi hamda O‘zbekiston Respublikasi Sog‘liqni saqlash vazirligi va Oliy ta’lim sohasidagi tegishli vazirliklarning (keyingi o‘rinlarda – vazirlik) Jismoniy va yuridik shaxslarning murojaatlari bilan ishlash, nazorat va monitoring bo‘limiga belgilangan tartibda hisobot taqdim etadi.

Bo‘lim o‘z faoliyatida quyidagi me’yoriy-huquqiy hujjatlarga amal qiladi:

O‘zbekiston Respublikasi Konstitutsiyasi va qonunlari;

O‘zbekiston Respublikasi Oliy Majlisi qarorlari;

O‘zbekiston Respublikasi Prezidentining farmonlari, qarorlari va farmoyishlari;

O‘zbekiston Respublikasi Vazirlar Mahkamasining qarorlari va farmoyishlari;

vazirlik buyruqlari va Hay’at qarorlari;

Bo‘lim Nizomi, institutning ichki buyruqlari va boshqa qonun hujjatlari.

2. Bo‘limning asosiy vazifalari

Quyidagilar Bo‘limning asosiy vazifalari hisoblanadi:

Institutda oliy ta’lim sohasiga oid qonunlar, yuqori tashkilotlar qaror va farmoyishlari, vazirlik Hay’ati qarorlari, buyruqlar, yo‘riq xatlar, modemogramma va telefonogrammalar, shuningdek institut Kengashi qarorlari hamda buyruqlarining bajarilishini nazorat qilish va monitoringini olib borish.

Jismoniy va yuridik shaxslarning murojaatlarini qabul qilish, ro‘yxatga olish, o‘rganish, tahlil qilish va ijrosini nazorat qilish.

Kadrlar tayyorlash sifati, ularga bo‘lgan ehtiyoj, mehnat bozori talablarining o‘zgarishi hamda institut bo‘yicha rejalashtirilgan tadbirlar ijrosini monitoring qilish.

Institutning moddiy-texnika bazasi holatini monitoring qilish tizimini ishlab chiqish va amaliyotga joriy etish.

Professor-o‘qituvchilar tarkibi hamda xalq xo‘jaligi kadrlarining malakasini oshirish va qayta tayyorlash sifati bo‘yicha ichki nazoratni tashkil etish va o‘tkazish.

3. Bo‘limning funksiyalari (amalga oshiradigan ishlari)

Bo‘lim o‘ziga yuklatilgan vazifalar doirasida quyidagilarni amalga oshiradi:

institutda ta’lim standartlari monitoringini tashkil etish bo‘yicha amaliy va uslubiy yordam ko‘rsatadi;

institutda ta’limning holati va rivojlanishi bo‘yicha ma’lumotlar bankini shakllantiradi hamda doimiy yangilab boradi;

korrupsiyaga qarshi kurashish va jamoat nazorati yo‘nalishida xalqaro standartlar va xorij tajribasini o‘rganib, takliflar ishlab chiqadi;

oliy ta’limni boshqarish organlariga (vazirlik, rektorat, institut Kengashi) ta’limni isloh qilish va takomillashtirish bo‘yicha tahliliy materiallar va takliflar tayyorlaydi;

institut Kengashi qarorlari va buyruqlar ijrosini ta’minlash tizimini ishlab chiqadi hamda tatbiq etadi;

ijrochilik faoliyatini tahlil qilib, aniqlangan kamchiliklarni bartaraf etish bo‘yicha amaliy-uslubiy yordam ko‘rsatadi;

ilg‘or tajribalarni o‘rganadi, umumlashtiradi va ularni ommalashtirishga sharoit yaratadi;

professor-o‘qituvchilar faoliyatini baholashda reyting usullarini joriy etish bo‘yicha ishlarni tashkil qiladi.

4. Monitoring natijalari bo‘yicha hisobot va takliflar

O‘zbekiston Respublikasining “Ta’lim to‘g‘risida” hamda “Kadrlar tayyorlash milliy dasturi to‘g‘risida”gi qonunlari, respublika hukumati qarorlari, vazirlik Hay’ati qarorlari, buyruq va yo‘riq xatlar ijrosi bo‘yicha monitoring ma’lumotlarini belgilangan muddatlarda vazirlikning Monitoring bo‘limiga hamda tegishli boshqarmalarga taqdim etilishini ta’minlaydi; xulosalarda ko‘rsatilgan kamchilik va muammolarni bartaraf etish bo‘yicha aniq takliflarni institut rahbariyatiga kiritadi.

Bo‘lim faoliyati har yili institut Kengashida muhokama qilinadi va o‘quv yili yakunida vazirlikka yillik hisobot taqdim etiladi.

5. Bo‘limning huquqlari

Bo‘lim quyidagi huquqlarga ega:

1. qonunlar, hukumat qarorlari, vazirlik hujjatlari hamda institut Kengashi qaror va buyruqlarining ijrosini fakultetlar, kafedralar va boshqa bo‘linmalarda tahlil qilish hamda natijalarni institut Kengashiga taqdim etish;

2. institut va unga tegishli ta’lim muassasalarida (malaka oshirish instituti, litsey va boshqalar) ta’lim standartlari hamda ta’limga oid me’yoriy hujjatlarga amal qilinishini nazoratdan o‘tkazish;

3. institutda o‘tkaziladigan barcha turdagi kengash yig‘ilishlari va ishchi majlislarda ishtirok etish;

4. xizmat vazifalarini bajarish uchun fakultetlar, kafedralar va boshqa tarkibiy bo‘linmalardan zarur hujjatlarni talab qilish, masalalarga mutaxassislarni jalb etish;

5. kurs ishlari, bitiruv malakaviy ishlari, magistrlik dissertatsiyalari himoyasi, davlat attestatsiyalari, nazariy va amaliy mashg‘ulotlar jarayonlarini kuzatish va tahlil qilish.

   ---