Xalqaro hamkorlik

Xitoy delegatsiyasining Farg‘ona jamoat salomatligi tibbiyot institutiga tashrifi doirasida xalqaro ilmiy va investitsion hamkorlik istiqbollari muhokama qilindi.

Joriy yilning … sanasida Farg‘ona jamoat salomatligi tibbiyot institutida muhim xalqaro tadbir bo‘lib o‘tdi. Mazkur tadbir doirasida Xitoy Xalq Respublikasining nufuzli ilmiy markazlaridan biri — Shanghai Lin-gang Research Center vakillari hamda yirik tibbiyot muassasalari va investorlar delegatsiyasi institutga tashrif buyurdi.

Uchrashuv davomida tomonlar o‘zaro manfaatli hamkorlik aloqalarini kengaytirish, akademik hamda ilmiy-tadqiqot yo‘nalishlarida strategik tashabbuslarni amalga oshirish bo‘yicha muzokaralar olib bordilar. Jumladan, quyidagi asosiy yo‘nalishlarda hamkorlikni yo‘lga qo‘yish masalalari muhokama qilindi:

• tibbiy ta’lim sohasida qo‘shma ilmiy-tadqiqot loyihalarini boshlash;

• professor-o‘qituvchilar va talabalar almashinuv dasturlarini ishlab chiqish va amalga oshirish;

• zamonaviy ko‘p tarmoqli tibbiy klinika qurilishi bo‘yicha investitsion loyihalarni amalga oshirish.

Delegatsiya institut infratuzilmasi, zamonaviy o‘quv binolari, ilmiy laboratoriyalar, klinik simulyatsiya markazi hamda amaliyot bazalari bilan tanishdi. Mehmonlar institutda joriy etilgan ilg‘or ta’lim texnologiyalari, yuqori malakali professor-o‘qituvchilar jamoasi hamda talabalar salohiyatiga yuksak baho berdilar.

Tashrif yakunida Shanghai Lin-gang Research Center hamda Farg‘ona jamoat salomatligi tibbiyot instituti o‘rtasida uzoq muddatli va istiqbolli hamkorlikni nazarda tutuvchi anglashuv memorandumi imzolash bo‘yicha kelishuvga erishildi.

Mazkur tashrif O‘zbekiston va Xitoy o‘rtasidagi ta’lim hamda sog‘liqni saqlash sohalaridagi strategik hamkorlikni yangi bosqichga olib chiqishda muhim qadam bo‘lib xizmat qilishi kutilmoqda.